Pamainan Babekhukan

Pamainan iko disabuik "Main Babekhukan," atau dalam bahaso Indonesia, "Main Berukan-Berukan." Namo iko kamungkinan barasa dari anak-anak maniru parangai jo gerak karo atau monyet . Pamainan iko biasonyo dimainkan pado malam hari kutiko bulan baru mulai naiak. Hal iko dapek dimainkan dek siapo sajo dari sagalo lapisan masyarakaik.

Pamainan ko dimainkan dek anak laki-laki sajo nan baumua antaro 8-12 tahun dan dimainkan dek paliang indak 3 urang anak atau labiah. Alaik nan digunoan dalam pamainan ko hanyolah 2 buah kain saruang jo surang anak nan siap untuak dijadikan objek (monyet).

Jalannyo pamainan

Duo buah kain saruang nan tasabuik di ateh, ciek buah dilatak-an di ateh kapalo anak nan marupokan objeknyo sahinggo manutuik saluruah muko jo satangah badannyo, samantaro nan ciek lai dililikkan di pinggang jo pungguangnyo.
Sambia mangguluangnyo ka ateh, mairiknyo dan mambantuaknyo manjadi ikua, sambia mangarajoan itu, katigo anak ko tagak, surang tagak di muko anak nan ka jadi objek (berukberukan) sambia mangguluang kain saruang nan malilik di pinggangnyo dan nan surang lai tagak di balakangnyo sambia mamacik dan mairik ujuang kain saruang nan kawannyo nan diguluang ka ateh.
Sadangkan anak nan manjadi objek hanyo tingga diam dan indak manggarik. Anak nan tagak di balakang juo baparan sabagai panangan (dukun), dimano sabagai inyo manarik jo maelus-elus ujuang kain saruang nan akan manjadi ikua sambia mambaco mantra di ateh.
Mantra ko dibacokan babarapo kali sampai anak nan manjadi objeknyo alah mulai manggarik jo manunjuakan tando-tando (gerakan) sarato suaro nan sarupo jo kera nan samo namonyo dan mancubo mailak dari ganggaman kaduo kawannyo.
Sudah tu kain saruang nan manutuik mukonyo dibukak, inyo dilapehkan. Sambia mangecek sarupo kera, anak tu malompek, balari, mamanjek kayu dan sabagainyo samo jo kera sabananyo.
Nan pantang dalam pamainan ko adolah kawan-kawannyo atau urang lain nan manonton indak buliah manyabuik atau maimbau namonyo, apolai katiko inyo sadang mamanjek batang kayu atau manggantuang, maayun-ayun dari dahan batang kayu nan tinggi.
Kalau namonyo disabuik atau diimbau, badannyo langsuang lamah dan bisa jatuah dari batang kayu. Disiko lah latak bahayo pamainan ko atau kalau disuruah manggaduah urang (panonton) bisa manggaruik jo manggigik.
Untuak mambaok baliak ka kasadaran anak nan alah lupo jo dirinyo cukuik manyabuik/maimbau namonyo babarapo kali, sudah tu mamaciknyo dan kaduo mato jo talingonyo dihambuangkan.
Manuruik informasi/carito saisuak, katiko surang anak masih ketek, babarapo informasi pernah tajadi bahaso surang anak nan alah manjadi monyet disuruah kawan-kawannyo mamanjek tiang telepon dan bajalan di sapanjang kawat, sajak anak tu dikenal pengecut di kampuangnyo.
Luar biasa bana inyo bisa bajalan elok sarupo monyet (gorila) di pertunjukan sirkus. Tapi sasudah barado di tangah-tangah rintangan kawat, namonyo indak sangajo dipanggia dek kawan-kawannyo untuak manyuruah inyo turun. Anak tu lansuang jatuah ka tanah (parit) jo luko-luko dan kakinyo patah. Ado pulo pamainan lain sarupo iko, namonyo Kakambingan (kambiang) jo Tatikusan (mancik).
Malalui mantra-mantra tatantu, anak nan digunoan sabagai objek dapek malupoan dirinyo dan akan batindak, batingkah laku, mambuek bunyi dan sabagainyo. Bak cando kambiang atau mancik nan sabananyo. Tapi sayang, informasi pado umumnyo alah lupo jo bunyi mantra-mantra tu, karano anak-anak ampia indak pernah bamain jo mantra-mantra tu lai.