Kaba Tjurito Siti Sjamsiah/Siti Sjamsiah ka Djakarta

Siti Sjamsiah ka Djakarta

Fasal IV

Pado hiduik dihiboi urang elok mantjari balatiah tulang pado tamakan hak urang elok mamakan tjutjua paluah kan io samaso itu dibao rang tuo ka Ulando maliek rupo si Sjamsiah rupo luruih tampak dimuko lagi parangai elok pulo suko Ulando manarimonjo.

Lorong kapado Ulando nantun guru sikolah di Batawi injo baranak duo urang anaknjo ketek baru nan saurang baumua anam bulan nan gadang baumua duo tahun. kok diliek njonja Ulando tampan elok lagi panjantun njonja panjaba elok budi samo elok kaduonjo patuik injo djadi guru tidak barapo antaronjo dibao balajia katanah Djawa kan io si Sari Anun tidak dapek batamu labiah sabulan tidak pulang rintang bagurau malapeh hati tidak tantu tampek tingga bapasan sadjo pado urang mamintak izin karilahan.

Salamo injo dalam kapa tampek elok si Sjamsiah tjapek kaki ringan tangan alun disuruah alah pai balun ditagah alah baranti pandai pulo mambudjuak anak sangaik panjajang djopadja sirah panjantun kaanak anak lamo lambek balaia tibolah kapa di Tandjuang Pariuak palabuhan nan sangaik gadang banjak kapa kalau masuak pusek djalo pumpunan ikan urang nan sangaik rami bana ma alum tuan tantang itu ibu nagari Hindia Balando disinan duduak tuan basa mamatjik tampuak pulau nangko kan io siti Sjamsiah salamo tingga di Batawi hati nan lai sanang sadjo disiko kaba diantikan.