Jan Mangutip dari Wikipedia!/Baa isi artikel di Wikipedia bahaso Inggirih jo Indonesia babeda?

Konten nan ado di Wikipedia bahaso Inggirih jo bahaso Indonesia tantu sajo babeda, karano satiok artikel di Wikipedia dibuek dek urang nan babeda-beda. Memang, artikel Wikipedia dapek dibuek dek bot (robot), tapi biasonyo untuak hal-hal batopik repetitif saparti pambagian wilayah, taksonomi biologi, atau panamoan objek luar angkasa. Untuak topik artikel salain tu, tatok dibuek dek urang jo dikambangan dek urang pulo.

Baa artikel di bahaso Inggirih labiah banyak daripado di bahaso Indonesia? Hal iko dikaranokan kontributor Wikipedia bahaso Inggirih jauah labiah banyak dibandiangan Wikipedia bahaso Indonesia. Kini ko, di Wikipedia bahaso Inggirih ado sakitar 66.000 pangguno aktif satiok bulannyo (aktif di siko diartian pangguno nyo manyuntiang labiah dari 5 kali satiok bulannyo), sadangkan di bahaso Indonesia angko itu hanyo 1000. Dari angko tu sanak dapek mancaliak salisiah jumlah nan jauah antaro kontributor nan dimiliki — nan bapangaruh ka banyaknyo konten antaro kaduo versi Wikipedia.