Asal-Usul Danau Toba
Asal usul Danau Toba adolah carito rakyat dari urang Batak Toba manganai tabantuaknyo Danau Toba, nan sacaro administratif masuak dalam babarapo kabupaten di Provinsi Sumatera Utara: Samosir, Toba, Simalungun, Karo, Tapanuli Utara, Humbang Hasundutan, jo Dairi. Ado babarapo mode tantang carito ko. Pado laman ko hanyo manyadiokan carito ciek mode.
Sinopsis
[suntiang | suntiang sumber]Ado salah surang patani nan banamo Toba nan iduiknyo mambujang. Inyo baharok sabanta lai punyo bini jo anak. Suatu hari, sasudah bakarajo di ladangnyo, inyo pai mamanciang ka batang aia sarupo hari biaso. Nan indak biaso, hari tu inyo dapek ikan gadang, bawarna ameh. Katiko inyo manangkok ikan tu, inyo takajuik mancaliak ikan tu baso inyo bisa mangecek. Ikan tu mamohon supayo jan dimakan. Dek takajuik, Toba manjatuahan ikan tu ka tanah, dan ikan tu lansuang barubah manjadi padusi nan rancak.
Padusi tu bausaho mananangan Toba. Inyo manjalehan baso Toba baru sajo mambebaskannyo dari kutukan dewata. Inyo mangatokan bahwasanyo inyo amuah manjadi bini si Toba dan baranak jo inyo. Namun, ado ciek janji nan haruih dipanuahi dek Toba: yaitu inyo dilarang untuak mangecekkan asa usua padusi tu, karano inyo barasa dari ikan, kapado siapo sajo, tamasuak anak-anaknyo nan akan datang. Toba pun satuju jo syaraik nan disabuikkan.
Toba jo pasangannyo malahiaan surang anak laki-laki nan banamo Samosir. Inyo mudah lapa dan banyak makan. Acok kali wakatu makan, inyo mahabihan makan untuak porsi tigo urang surang.
Suatu ari, Samosir disuruah maantaan makanan ka ayahnyo ka sawah. Makanan tu indak jadi diantaannyo malah dimakannyo surang. Toba nan sadang lapa pulang jo kondisi berang. Berang si Toba katiko tau makanan tu lah abih dimakan dek si Samosir dan inyo sadang sibuk main. Inyo bangih dan indak sadar maimbau Samosir anak ikan. Sakatiko inyo sadar alah mungkia janji jo bininyo, Toba langsuang manutuik muluiknyo. Pado wakatu itu, bini jo anak-anaknyo ilang. Tibo-tibo, hujan badai turun indak baranti-ranti sampai sungai tu maluap dan marandam Toba jo kampuangnyo. Aia banjir nan laweh ko kudian manjadi Danau, nan dinamokan Danau Toba, dan bukik ketek di tangah dinamokan manjadi Pulau Samosir.