Asa usua namo pempek
Sajak zaman saisuak, Kota Palembang atau Sriwijaya alah sangaik tanamo, sainggo mambuek para parantau dari barbagai panjuru nagari badatangan ka sinan untuak manggaleh, manuntuik ilimu, sarato manyebarkan agamo jo kabudayaan urang tu. Di antaronyo iyolah parantau dari daratan Tiongkok.
Konon kabanyo, pado abaik ka-16 dima Sultan Mahmud Badaruddin II nan mamimpin nagari tasabuik, Kota Palembang alah dipadek-i dek para parantau dari Tiongkok. Pado maso pamarentahannyo, sadoalah etnis masyarakaik dilinduangi tamasuak para parantau dari Tiongkok tu. Di sampiang pandai manggaleh, para parantau ko pandai pulo maolah masakan. Sainggo banyak muncua aneka masakan nan marupokan papaduan antaro masakan lokal jo kaum pandatang.
Malalui Sungai Musi sabagai jalua utamo lalu linteh, urang tu mampagunokannyo sabagai tampek transaksi padagangan. Sungai ko manjadi tampek mancari rasaki pulo bagi masyarakaik lokal khususnyo kaum nalayan. Lauak di siko malimpah ruah malahan takadang rancak mambusuak sarato tabuang parcuma sajo.
Banyak masyarakaik etnis Tionghoa nan bamukim di tapi sungai bapacaharian sabagai panggaleh sarato nalayan, nan kabanyakannyo adolah laki-laki nan alah gaek. Urang tu biasonyo manggaleh makanan jo caro bakaliliang kampuang, dan masyarakaik sakitar biasonyo maimbaunyo jo sabutan "''pek''" atau "''apek''".
Para ''apek'' ko maraso ibo hati mancaliak kondisi lauak di Sungai Musi nan alun taolah sacaro maksimal. Lantas urang tu mancubo manggiliang aluih dagiang lauak tasabuik, dicampua jo tapuang sagu sarato ditambuah jo bumbu-bumbu sarato rampah-rampah. Kironyo rasonyo lamak bana. Jajanan tu mandapek sambutan elok pulo dek urang nan mambali, tapi sangkek tu masyarakaik alun mangatahui namo makanan tu. Mako jikok apak-apak gaek tasabuik babaliak manggaleh kaliliang, urang-urang nan ka mambali cukuik manariak-i maimbau, “''pek'', ''apek''..!". Lamo-kalamoan, imbauan ''pek'' ko samakin lakek jo jajanan baru nan digalehkan tu. Akhianyo makanan jinih baru ko manjadi makanan khas sarato tanamo jo namo '''pempek'''.